- २०८१ बैशाख १५ शनिबार
काठमाडौँ । अखिल नेपाल फुटबल संघ (एन्फा) ले नयाँ लोगो सर्वजनिक गरेको छ ।
सोमबार एक कार्यक्रमका बिच एन्फाले पोखराका सन्दीप तिवारीले तयार पारेको लोगो एन्फाको नयाँ लोगो सार्वजनिक गरेको हो ।
गत साउनमा एन्फाले नयाँ लोगोका लागि खुला प्रतिस्पर्धाको आव्हान गरेको थियो । जसबाट ५७० जनालाई पछि पार्दै सन्दीपको लोगो छानिएको हो । लोगो बनाए बापत सन्दीपलाई ५० हजार रूपैयाँ दिइएको छ ।
नयाँ लोगोको सबैभन्दा माथि अंग्रेजी अक्षरमा नेपालको नाम रहेको छ । ठीक त्यसैमुनि विश्वको सर्वोच्च शिखर सगरमाथा र पुछारमा चन्द्र र सुर्य अंकित नेपालको झण्डा छ । पुछारमा फुटबलको चिन्ह रहेको छ ।
नेपालको शिर ठाडो पार्ने काम सगरमाथाले गर्नेछ । ठाडो शिरमा नेपालको झन्डा फहरिदाको डिजाइनलाई लोगोमा देखाउन खोजिएको छ ।
फुटबलमा संघीय संरचना अनुसार ७ प्रदेशलाई प्रतिनिधित्व गर्ने संकेत राखिएको छ । जर्सीमा नेपाल लेखिनेछ भने एन्फाको लोगोमा एन्फा रहनेछ ।
एन्फाको लोगो दोस्रोपटक परिवर्तन भएको हो । यसअघि विसं २०६२–६३ को जनआन्दोलन पछि श्रीपेचको स्थानमा फुटबल राखेर नयाँ लोगो तयार पारिएको थियो ।
