काठमाडौँ । पाकिस्तान सुपर लिग (पिएसएल) अन्तर्गत लाहोर कलान्दर्स इस्लामावाद युनाइटेडसँग ४९ रनले पराजित भएको छ ।
गएराती भएको खेलमा इस्लामावाद युनाइटेडले दिएको २३९ रनको लक्ष्य पछाएको लाहोरले २० ओभरमा ९ विकेट गुमाउदै १८९ बनाएपछि ४९ रनले खेल गुमाउन पुग्यो ।
लाहोरका लागि शोहैल अख्तरले सर्वाधिक ७५ रन बनाए भने फखर जमानले ३८ रन बनाए । इस्लामावादका बलर फहीम अशरफले ६ विकेट लिए । फहीमले ४ ओभरमा १९ रन दिएर लाहोरका ६ विकेट लिएका थिए ।
यस अघि टस हारेर पहिला ब्याटिंग गरेको इस्लामावादले २० ओभरमा ३ विकेट गुमाएर २३८ रन बनाएको थियो । इस्लामावादका लागि क्यामरुन डेल्पोर्टले उत्कृष्ट शतक बनाएका थिए । डेल्पोर्टले ६० बलमा १३ चौका र ६ छक्काको मद्धतले ११७ रन अविजित बनाएका थिए । त्यस्तै चडविक वाल्टनले ४८ रन र आसिफ अलीले ५५ रन बनाएका थिए ।
महँगो भए सन्दीप :
नेपाली युवा बलर सन्दीप लामिछानेले पहिलो ओभरमा उत्कृष्ट बलिङ गरेपनि त्यसपछिक तीन ओभरमा महँगो साबित भएका छन् । सन्दीपले आफ्नो ४ ओभरको स्पेलमा कुल ४६ रन दिएर १ विकेट लिएका हुन् ।
सन्दीपले पहिलो ओभरमा केबल एक रन दिएर इस्लामावादका फिलिप साल्टलाई १० रनको निजी रनमा आउट गराएका थिए ।
तीन ओभरमा एक विकेट लिएर २० रन दिएका सन्दीपले चौथो ओभरमा ४ छक्कासहित २६ रन खाएका थिए ।
यो सँगै सन्दीपले यस प्रतियोगितामा ६ खेलमा कुल ११ विकेट लिएका छन् ।
यो हारसँगै लाहोरले ९ खेलमा केबल ३ खेल जितेर ६ अंक बटुल्दै पाँचौ स्थानमा रहेको छ । लाहोर प्लेअफमा पुग्ने झिनो सम्भावना भने अझै बाँकी रहेको छ । लाहोरले अब अन्तिम खेलमुल्तान सुल्तानसँग खेल्ने छ । तर लाहोरले अन्तिम खेल जितेपनि हाल चौथो स्थानमा रहेको कराची किंग्स बाँकी दुई खेलमा पराजित भएमा लाहोर प्लेअफमा पुग्ने छ ।
क्वेटा ग्लाडियटर्स, इस्लामावाद युनाइटेड र पेशावर जालमी प्लेअफमा पुगिसकेका छन् ।