बारा । उद्योग वाणिज्य श्रम तथा उपभोक्ता हित समितिका १२ जना संसदीय टोलीले मोतिहारी–रक्सौल–अमलेखगंज पेट्रोलियम पाईप लाईनको अध्ययन अनुगमन गरेको छ ।
राष्ट्रिय गौरवका आयोजना मध्येको मोतिहारी–रक्सौल–अमलेखगंज पेट्रोलियम पाईप लाईन निर्माणको कामको दुई दिने अनुगमनका लागि आएका संसदिय टोलीले नेपालमा पर्ने पाईप लाईनको बारेमा अध्ययन गरेको हो ।
टोलीले पहिलो दिन बिहिवार नेपाल भित्र रहेको ३६.२ किलोमिटर र दोस्रो दिन शुक्रवार भारत तर्फको ३३.७ किलो मिटर क्षेत्रमा निर्माण भैरहेको पाईपलाईनको अवस्थाको अध्ययन अवलोकन गरेको छ ।
अवलोकनको क्रममा बाराको अमलेखगंज स्थित नेपाल आयल नियममा आएको संसदिय टोलीले दुई दिनको अध्ययन अवलोकन पछि सरकार र आयल निगमलाई पेट्रोलीयम पाईप लाईन र्मिाणको अवस्थाको बारेमा आफ्नो प्रतिबेदन बुझाउँने टोलीका संयोजक विमल प्रसाद श्रीवास्तबले जानकारी दिए ।
२०७५ बैशाख ४ गते देखि पाईप गाड्ने काम शुरु गरेको यस योजनाको पाईप लाईन गाड्ने काम सकिएको र अन्य प्राविधिक काम चलिरहेको नेपाल आयल निगमका निर्देशक विरेन्द्र गोईतले जानकारी दिए ।
उनले पाईप लाईनको सुरक्षा मुख्य चुनौती विषय रहेको बताउँदै सुरक्षा गर्ने जिमेवारीको बारेमा छलफल भैरहेको र संभवतः नेपाली सेनालाई दिने सम्भावना रहेको बताए ।
निर्माणाधिन पेट्रोलीयम पाईप लाईनबाट नेपालमा हाल डिजेलको खपत बढि हुँने गरेकोले तत्काल डिजेल मात्र ल्याइँने र विस्तारै मट्टितेल र पेट्रोलको भण्डारण ट्याङ्क निर्माण भए पश्चात मट्टितेल र पेट्रोल पनि सोहि पाईप लाईन मार्फत आयात हुँने योजना आयल निगमको रहेको छ ।