- २०८१ बैशाख २० बिहीबार
चितवन । कृषि तथा वन विज्ञान विश्वविद्यालयको दोस्रो दीक्षान्त समारोह भर्चुअल माध्यमबाट गरिने भएको छ ।
यही वैशाख १४ गते गर्न लागिएको समारोहमा सम्मानित हुने विद्यार्थी, विद्यावारिधिका र सिनेट सदस्यबाहेक अन्यको सहभागिता भर्चुअल माध्यमबाट हुने विश्वविद्यालयले जनाएको छ ।
विश्वविद्यालयले आज यहाँ पत्रकार सम्मेलनको आयोजना गरी विभिन्न विधामा पदक पाउने ४० विद्यार्थी र सिनेट सदस्यहरु २३ जनाको भौतिक उपस्थिति हुने र अन्य दीक्षित हुने विद्यार्थीहरुको सहभागिता भर्चुअल माध्यमबाट हुने जनाएको हो । विद्यालयका उपकुलपति प्राडा पुण्यप्रसाद रेग्मीका अनुसार दोस्रो दीक्षान्त समारोहमा एक हजार २५७ जना विद्यार्थी भर्चुअल माध्यमबाट सहभागी हुनेछन् ।
स्नातक, स्नातकोत्तर र विद्यावारिधि तहका विद्यार्थीहरुलाई दीक्षित गरिने छ । स्नातक तहमा कृषि स्नातकबाट ५१२, वन विज्ञान स्नातकबाट २२४, पशु चिकित्सा स्नातकबाट १४०, मत्स्य विज्ञान स्नातकबाट ४४ जना सहभागी हुनेछन् । यस्तै, स्नातकोत्तर तहमा कृषिका २२५, जैविक प्रविधिका ६, वन विज्ञानका १४, पशु विज्ञानका ३२, पशु चिकित्साका ३८, मत्स्य विज्ञानका सातजना सहभागी हुने उनले बताए । यता विद्यावारिधितर्फ १५ जना विद्यार्थी सहभागी हुनेछन् ।
दीक्षान्त समारोहमा प्रधानमन्त्री केपी शर्मा ओली, शिक्षा, विज्ञान तथा प्रविधिमन्त्री कृष्णगोपाल श्रेष्ठ सहितका विभिन्न व्यक्तित्वहरुको सहभागिता रहने विद्यालयकी रजिष्ट्रार डा शारदा थपलियाले जानकारी दिइन् । उनका अनुसार विश्वविद्यालयमा हाल तीन हजार ३२३ जना विद्यार्थी अध्ययनरत रहेका छन् ।
यस विश्वविद्यालयले नेपालको विभिन्न स्थानमा रहेको सातवटा कलेजलाई सम्बन्धन दिई पठनपाठन सञ्चालन गर्दै आएको छ । जसमध्ये ६ वटा कृषि सङ्कायका र एउटा वन विज्ञान सङ्कायको रहेको छ ।
