- २०८१ बैशाख १८ मंगलबार
विराटनगर । पाँच महिनादेखि सभामुखविहीन रहेको कोशी प्रदेशसभाले आजै सभामुख पाउने भएको छ । कोशी प्रदेशसभाकी उपसभामुख सिर्जना दनुवारका अनुसार आज ३ बजे सभामुखको निर्वाचन गर्नेगरी कार्यसूची प्रकाशित गर्ने निर्णय भएको हो ।
कोशीमा राप्रपाका सांसद अम्बरबहादुर विष्टलाई सभामुख बनाउन सत्ता गठबन्धन र प्रतिपक्षी दल नेकपा एमाले सहमत भएका छन् । कांग्रेस र एमालेको मंगलबार बिहान बसेको संसदीय दलको बैठकले राप्रपाका विष्टलाई सभामुखमा समर्थन गर्ने निर्णय गरेका छन् । त्यस्तै नेकपा माओवादी केन्द्र, नेकपा एकीकृत समाजवादी र जसपा पनि राप्रपालाई सभामुख दिन तयार देखिएका छन् ।
सबै दलले समर्थन गर्ने भएपछि बिष्ट निर्बिरोध सभामुख बन्ने भएका छन् ।
गत साउन १६ तत्कालीन सभामुख बाबुराम गौतमले राजीनामा दिएर कांग्रेस संसदीय दलका नेता उद्धव थापालाई मुख्यमन्त्री बनाउन सघाएयता कोशीमा सभामुख पद रिक्त छ । गत वर्षको पुस २८ गते निर्विरोध निर्वाचित सभामुख गौतमले राजीनामा दिँदै आर्थिक मामिला तथा योजना मन्त्रालय रोजेका थिए ।
