- २०८१ बैशाख १६ आइतबार
सोल। दक्षिण कोरियामा डाक्टरहरूको हडताल चलिरहेको छ । हडतालबिच अस्पतालहरूले बिरामी लिन नमानेपछि ८० वर्षीय वृद्धाको एम्बुलेन्समै मृत्यु भयो । मृत्युको कारण हृदयघात बताइएको छ ।
एम्बुलेन्सले वृद्धालाई भर्ना गर्न अनुरोध सहित भन्दै ७ ओटा अस्पताललाई फोन गरेको थियो । तर कर्मचारी र शय्याको अभाव भन्दै कसैले पनि वृद्धालाई भर्ना गर्न मानेनन् ।
पहिलो पटक मद्दतका लागि फोन गरेको ६७ मिनेटपछि बल्ल एउटा सरकारी शिक्षण अस्पताल वृद्धालाई भर्ना गर्न तयार भयो । तर त्यतिबेलासम्म वृद्धाको मृत्यु भइसकेको थियो । यो घटनालाई कोरियाको सञ्चार माध्यमहरुले व्यापक रुपमा प्रचार प्रसार गरिरहेका छन् ।
डाक्टरहरूको हडतालका कारण बिरामीको मृत्यु भएको यो पहिलो घटना भएको बताइएको छ । यस मामिलामा सरकारले छानबिन सुरु गरेको छ ।
चिकित्सकहरूको संख्या बढाउन तालिम दिने सरकारी योजनाको विरोधमा गएको हप्तायता कोरियामा करिब ७० प्रतिशत कनिष्ठ डाक्टरहरू हडतालमा छन् । प्रतिस्पर्धा चर्किने भयमा प्रशिक्षार्थी र रेसिडेन्ट डाक्टर सरकारको सो योजना विरुद्ध हडताल गरिरहेका छन् ।
अस्पतालहरूले आकस्मिक बाहेकको सेवा बन्द गरेपछि अस्पतालका आकस्मिक कक्षमा बिरामीको चाप बढेको छ । शल्यक्रियालाई पछाडि सारिएको छ । एम्बुलेन्सलाई बिरामी भर्ना दिइदिने अस्पताल भेट्नै मुस्किल भइरहेको छ ।
देशभरका सयौँ अस्पतालमा ९ हजारभन्दा धेरै डाक्टर काममा फर्किन अस्वीकार गरिरहेका छन् । करिब १० हजारले राजीनामा दिएका छन् ।
