- २०८१ बैशाख १७ सोमबार
काठमाडौँ। एसिया कप छनौट प्रतियोगिताको तयारीको लागि श्रीलंकाको कोलम्बोमा रहेको नेपाली क्रिकेट टिमले तेस्रो तथा अन्तिम अभ्यास खेल पनि जितेको छ। नेपालले कोल्ट्स क्लबलाई ५ विकेटले पराजित गरेको छ।
कोल्ट्स क्लबले दिएको २१७ रनको लक्ष्य नेपाली टिमले ४३ ओभरमा ५ विकेट गुमाउदै लक्ष्य पुरा गरेको थियो। नेपालको जितमा कप्तान पारस खड्काले ५८ रनको अर्धशतकीय पारी खेलेका थिए भने ज्ञानेन्द्र मल्लले ४५ रन बनाएका थिए। नेपालका लागि दिपेन्द्रसिंह ऐरी र आरिफ शेखले ६८ रनको साझेदारी गरेका थिए। दिपेन्द्रले नट आउट ५३ बलमा आफ्नो अर्धशतक पुरा गर्दै ५२ रन बनाएका थिए भने आरिफले २३ रन बनाएका थिए। नेपालका लागि सुबास खकुरेलले २२, सगर पुनले ५ र बिनोद भण्डारीले एक रङ बनाएका थिए।
कोल्ट्स क्लबको मैदानमा कोल्ट्स क्लबले टस जितेर पहिले ब्याटिंग गदै निर्धारित ४९.५ ओभरमा अलआउट हुदै २१६ रन बनाएको छ । नेपालका लागि सोमपाल कामीले ३, करण केसीले र सागर पुनले २-२ विकेट र दिपेन्द्र सिंह ऐरीले एक विकेट लिएका थिए । त्यस्तै कोल्टस क्लबका लागि हसन हेवानले ५९ , आयानले ३६, मधुरा लकमलले ३१ रन बनाए भने विश्व चतुरंगले २६ रन बनाएका थिए।
आजको अभ्यास खेलमा ललित भण्डारी, बसन्त रेग्मी र अनिल कुमार शाहलाई आराम दिइएको छ भने आजको अभ्यास खेलको अन्तिम ११ मा पारस खड्का (कप्तान), ज्ञानेन्द्र मल्ल, दिपेन्द्र ऐरी, सोमपाल कामी, करण केसी, ललित राजबंशी, आरिफ शेख, रोहित पौडेल, सागर पुन, विनोद भण्डारी र सुबास खकुरेल रहेका छन्।
यसअघि खेलेका दुवै अभ्यास खेल जितेको नेपाली टोली श्रीलंकामा आजको आफ्नो अन्तिम अभ्यास खेल पछि भाद्र ११ गते एशिया कप क्वालिफायरको लागि मलेसिया जाने कार्यक्रम रहेको छ।
