- २०८१ बैशाख १७ सोमबार
वासिङटन। अमेरिकी राष्ट्रपति डोनाल्ड ट्रम्पले अमेरिकी विदेश मन्त्रालयकी प्रवक्ता हिथर नुअर्टलाई राष्ट्रसंघका लागि भावी अमेरिकी राजदूतमा मनोनयन गर्ने सम्भावना रहेको अधिकारीहरुले बताएका छन् ।
ह्वाइट हाउसका दुईजना अधिकारीले हिथरको मनोनयन लगभग पक्का भएको बताए । एकजना रिपब्लीकन सहयोगीले राष्ट्रपति ट्रम्पले शुक्रबारसम्ममा हिथरको नाम घोषणा गर्ने जानकारी दिए ।
ट्रम्पले यसअघि नै नुअर्टका बारेमा सकारात्मक रहेको प्रतिक्रिया दिएका थिए । राष्ट्रसंघका लागि अमेरिकी राजदूत निकी हेलीले गत अक्टोबरमा यसैवर्षको अन्त्यबाट लागू हुनेगरी राजीनामा दिइसकेकी छन् । हेलीको राजीनामा राष्ट्रपति ट्रम्पले स्वीकार गरिसकेका छन् । नुअर्टको नाम सिनेटले अनुमोदन गरेमा उनी ट्रम्पको विदेश नीतिका बारेमा बोल्ने एक प्रमुख अधिकारी बन्नेछिन् ।
राष्ट्रपति ट्रम्पले गत महिना एक पत्रकार सम्मेलनमा नुअर्ट निकै सक्षम रहेको बताएका थिए । उनले नुअर्टले आफूलाई धेरै पहिलेदेखि मद्दत गरिरहेको पनि जानकारी दिएका थिए । ट्रम्पले औपचारिक रुपमा घोषणा नगर्दासम्म कुनै पनि विषय अन्तिम हुँदैनन् ।
नुअर्टले भने कुनै प्रतिक्रिया दिन अस्वीकार गरेकी छन् । अमेरिकी विदेश मन्त्रालयको प्रवक्तामा नियुक्त हुनुअघि नुअर्ट फक्स न्यूज च्यानलमा संवाददाता थिइन् ।
