- २०८१ बैशाख २१ शुक्रबार
काठमाडौँ । फिल्म ‘वीरविक्रम २’ को दोस्रो गीत सार्वजनिक गरिएको छ । बाचा शिर्षकको गीतमा नायक पाउल शाह र वर्षा शिवाकोटी फिचर्ड रहेका छन् ।
यसअघि सार्वजनिक गरिएको पुरानो चर्चित गीत ‘पिरतीको मिठो तिर्सना’ गीतको लोकप्रियता पछि यो दोस्रो गीत सार्वजनिक गरिएको छ ।
यस गीतमा तारा प्रकाश लिम्बु र दीपा लामाको स्वर रहेको छ । गीतलाई नरेश भट्टराईले लेखेका हुन् भने गीतमा तारा प्रकाश लिम्बुकै संगीत रहेको छ । यस गीतमा कोरियोग्राफी कविराज गहतराजको रहेको छ ।
जेठ ३ गते प्रदर्शनमा आउने यस फिल्म फिल्मलाई सुदीप बरालले खिचेका हुन् । फिल्ममा बुद्धि तामाङ, देशभक्त खनाल, विनिशा भण्डारी, विनोद सुवेदी खत्री, मनिष लिम्बुलगायतका कलाकारहरुको अभिनय छ । हिमाल केसीको द्वन्द्व रहेको फिल्मको कथा प्रदीप भारद्धाजले लेखेका हुन् । फिल्मलाई मिलन चाम्सले निर्देशन गरेका हुन् ।
फिल्ममा अपर्ण सापकोटा सह-निर्माताको रुपमा रहेका छन् । नयाँ कथामा निर्माण भइरहेकाले ‘वीरविक्रम २’ सिक्वेल नभएको निर्माण टिमको भनाई छ ।
यस फिल्मको पहिलो भागमा नाजिसँगै दयाहाङ राई, अनुप विक्रम शाही, दीया पुन लिड रोलमा थिए ।
