- २०८१ जेठ २ बुधबार
पोखरा । गण्डकी प्रदेशका मुख्यमन्त्री कृष्णचन्द्र नेपाली पोखरेल र संयुक्त राष्ट्र सङ्घीय विकास कार्यक्रम (युएनडिपी) का नायब आवासीय प्रतिनिधि बर्नान्डो कोकोबीच आज पोखरामा भेट भएको छ ।
मुख्यमन्त्री कार्यालयमा भएको भेटमा मुख्यमन्त्री पोखरेलले गण्डकी प्रदेशका साथै मुलुककै विकासको अभिन्न साझेदार युएनडिपीले गण्डकीमा भौतिक उपस्थिति नै जनाएर काम गर्दा अझ सहज हुने बताए । उनले भने, “गण्डकी प्रदेशमा सम्भव भए क्षेत्रिय कार्यालय नभए फिल्ड अफिस स्थापना हुनेछ भन्नेमा म विश्वस्त छु । आवश्यक निर्णयका लागि अनुरोध गर्दछु ।”
मुख्यमन्त्री पोखरेलले युनएनडिपीले गण्डकी प्रदेशको पर्यटन क्षेत्रको विकासका लागि परियोजनामा सहकार्य गर्ने इच्छा देखाएकामा त्यसलाई छिट्टै पूर्णता दिने विश्वास दिलाए । उनले भने, “नव प्रवर्तनका क्षेत्र, साना तथा मझौला उद्योगको विकास र कृषिको आधुनिकीकरण गर्न युएनडिपीले सहयोग गरिदियोस भन्ने हाम्रो चाहना छ ।” मुख्यमन्त्री पोखरेलले उद्यमशीलता प्रवद्र्धन, कृषिको बजारीकरण र डिजिटल प्रविधिको प्रयोगमा युएनडिपीले भविष्यमा महत्वपूर्ण सहयोग गर्नेछ भन्ने विश्वास व्यक्त गरे ।
युएनडिपीको सहयोगमा वालिङ नगरपालिकामा सञ्चालित उद्यम विकासलगायतका कार्यक्रम प्रभावकारी भएकाले त्यस्ता असल अभ्यासलाई सबै पालिकामा लैजाने सन्दर्भमा प्रदेश सरकार युएनडिपीसँग सहकार्य गर्न इच्छुक रहेको मुख्यमन्त्री पोखरेलको भनाइ थियो ।
नायब आवासीय प्रतिनिधि काकोले योजना निर्माण, सुशासन, हरित अर्थतन्त्र, लघुउद्यम प्रर्वद्धन लगायतका कार्यक्रममा युएनडिपी सहकार्य गर्न तयार रहेको बताए । उनले आजै पर्यटन उद्योग तथा आपूर्तिमन्त्री मणिभद्र कँडेल, प्रदेश नीति तथा योजना आयोगका उपाध्यक्ष डा रघुराज काफ्लेसँग पनि भेट गरे ।
