- २०८१ बैशाख २५ मंगलबार
काठमाडौँ । मुसलधारे वर्षाका कारण आएको बाढीपछि न्यूजिल्याण्डको सबैभन्दा ठूलो सहर अकल्यान्डमा आपतकाल घोषणा गरिएको छ ।
यसअघि शुक्रबार अकल्याण्डमा भीषण वर्षा भएको थियो, जसका कारण मानिसहरु विस्थापित हुन बाध्य भएका थिए । अविरल वर्षाका कारण आएको बाढीका कारण यातायात र विद्युत आपूर्ति ठप्प भएको छ ।
अकल्यान्डमा गर्मीको मौसममा ७५ प्रतिशत पानी मात्र १५ घण्टामा परेकोले सहरले बाढीको सामना गर्नुपरेको बताइएको छ ।
अकल्याण्डमा विगत २४ घण्टामा परेको वर्षाको प्रभाव जनताले लामो समयसम्म महसुस गर्ने मौसम पूर्वानुमान निकायले जनाएको छ ।
अकल्याण्डका मेयर वेन ब्राउनले सहरको उत्तरी तटमा रहेको भाराव उपत्यकामा एक व्यक्तिको शव फेला परेको रिपोर्टको पुष्टि गरेका छन् । हावाहुरीले सहरका पूर्वाधार र आपतकालीन सेवा पूर्णरुपमा ध्वस्त भएको पनि मेयरले बताएका छन् ।
यसैबीच, मेयरले संकटकाल घोषणा गर्न ढिलाइ भएको भन्दै आलोचनाको जवाफ दिँदै आफूले विज्ञको सल्लाहअनुसार काम गरिरहेको बताएका छन् ।
अर्कोतर्फ, न्यूजिल्याण्डको फायर एण्ड इमर्जेन्सी सर्भिसले मद्दतको लागि करिब १,५०० कल आएको बताएको छ । न्यूजिल्याण्ड सेनाले मानिसहरूलाई बाहिर निकाल्न मद्दत गरिरहेको छ र शहरमा आपतकालीन आश्रयहरू स्थापना गरिएको छ।
बाढीका कारण शहरका प्रमुख सडकमा सवारी आवागमन ठप्प भएको छ भने राजमार्गमा लामो जाम भएको छ । धेरै ठाउँमा दुर्घटनाको खबर पनि आएको छ ।
यस बाढीका कारण अकल्यान्डको विमानस्थलबाट विमानको आवतजावत प्रभावित भएको छ । कम्तीमा शनिबार दिउँसोसम्म आन्तरिक तथा अन्तर्राष्ट्रिय उडान बन्द गरिएको छ ।
यसैबीच, प्रसिद्ध गायक एल्टन जोनको कन्सर्ट पनि रद्द गरिएको छ ।
