- २०८१ बैशाख २९ शनिबार
काठमाडौँ । तपस्वी मानिएका रामबहादुर बम्जनको आश्रमबाट चार अनुयायी बेपत्ता भएको प्रहरीको केन्द्रीय अनुसन्धान ब्युरो (सीआईबी) ले जनाएको छ ।
बुधबार सर्वजनिक गर्दै सिआईबीले बम्जनको आश्रमबाट चार अनुयायी हराएको उजुरी प्राप्त भएको एसएसपी दिनेश आचार्यले जानकारी दिएका छन् ।
व्यक्ति बेपत्ता, बाल यौन दुराचारलगायत आरोपमा सीआईबीले बमजनलाई मंगलबार साँझ हात्तिगौँडाबाट पक्राउ गरेको थियो । सीआईबीले उनलाई पक्राउ गर्न ‘अप्रेसन ब्लु’ चलाएको थियो । बम्जन विगत २ महिनादेखि हात्तिगौँडामा परिवारसँग रहेको प्रहरीको दाबी छ ।
बम्जनको निवासबाट सिआईबीले नेपाली र विदेशी गरी कुल ३ करोड ३४ लाख ३७ हजार ९०६ रुपैयाँ बरामद गरेको जानकारी दिएको छ । साथै सिआईबीले उनको घरबाट विभिन्न ब्रान्डका १४ मोबाइल, ५ आइप्याड, २० पेनड्राइभ बरामद गरेको जानकारी दिएको छ ।
बम्जनलाई आजै सर्लाही पठाउने प्रहरीको तयारी रहेको छ ।
