- २०८१ बैशाख १८ मंगलबार
काठमाडौँ। प्रधानमन्त्री एवम् नेपाल कम्युनिस्ट पार्टी (नेकपा)का अध्यक्ष केपी शर्मा ओली र पार्टीका अर्का अध्यक्ष पुष्पकमल दाहाल ‘प्रचण्ड’ बीच पार्टीको तल्ला तहको एकता एवं सरकारको काम कारवाहीबारे छलफल भएको छ ।
प्रधानमन्त्री निवास बालुवाटारमा मंगलबार साँझ भएको छलफलमा प्रदेश र जिल्ला तहको पार्टी एकतालाई शीघ्र निष्कर्षमा पुर्याउन तथा जनवर्गीय सङ्गठनको एकतालाई टुङ्गोमा पुर्याउने विषयमा विचारविमर्श भएको थियो ।
प्रदेश, जिल्ला र जनवर्गीय सङ्गठनको एकताका लागि गठित अधिकांश कार्यदलले प्रतिवेदन बुझाएका छन् । तर पार्टीको सचिवालय बैठक बस्न नसक्दा ती प्रतिवेदन कार्यान्वयन हुन सकेको छैन । यस्तै छलफलमा सरकारको काम कारवाही र मुलुकको पछिल्लो राजनीतिक अवस्थाका बारेमा समेत कुराकानी भएको बुझिएको छ ।
मन्त्रीहरुको कामकारवाही बारे छलफल :
सरकारमा रहेका मन्त्रीहरुको काम बारे पनि दुवै अध्यक्षबीच छलफल भएको छ। दुवै अध्यक्षले राम्रो काम गर्न नसकेका मन्त्रीहरुलाई हेरफेर गर्ने बारे छलफल भएको बुझिएको छ । समग्रमा सरकारले जनताको आशा अनुसार काम गर्न नसकेको अवस्थामा दुई अध्यक्षले आवश्यक परे मन्त्रीहरुलाई हेरफेर गरेर पनि काम प्रभावकारी रुपमा गर्नुपर्ने विषयमा छलफल भएको छ।
