- २०८१ बैशाख १७ सोमबार
सुर्खेत। यो सातामा मात्र जुम्लामा तीन महिला एकैदिन जबर्जस्ती करणीको शिकार भएको उजुरी प्रहरीमा परेको छ । यही कात्तिक १८ गतेका दिन पातारासी गाउँपालिका–२ का एक र तिला गाउँपालिका–४ जुम्लाका दुई महिलाले आफू जबर्जस्ती करणीमा परेको उजुरी प्रहरीमा हालेका हुन् ।
पातारासीका पीडित महिलाको बयानका आधारमा जबर्जस्ती करणी गरेको आरोपमा सोही वडाका ४५ वर्षीय भैरे सार्कीलाई पक्राउ गरिएको जिल्ला प्रहरी कार्यालय जुम्लाका प्रहरी प्रमुख प्रहरी नायब उपरीक्षक सीताराम रिजालले जानकारी दिए।
तिला गाउँपालिकाका–४ जुम्लाका एकै घरका दुई महिला जबर्जस्ती करणीका चार आरोपित भने फरार रहेको प्रहरी नायब उपरीक्षक रिजालले बताउनुभयो । कात्तिक १८ गते घरभन्दा करीब छ किलोमिटर टाढा घाँस काटेर बेलुका ७ः३० बजे फर्कदै गर्दा दुई मोटरसाइकलमा आएका चार जनाको समूहले आफूलाई जबर्जस्ती करणी गरेको किटानी जाहेरीसहितको उजुरी परिसकेको र फरार आरोपितको खोजी कार्यलाई तीव्रता दिइएको उनले जनाए ।
उनका अनुसार फरार अभियुक्त पक्राउ नपरेकाले नै नाम सार्वजनिक गरिएको छैन । यही कात्तिक १ गते तातोपानी गाउँपालिका–२ जुम्लाका एक महिलालाई बलात्कार गरेको आरोपमा सोही गाउँपालिका–३ का २६ वर्षीय भक्त सार्कीलाई पक्राउ गरी अनुसन्धान थालिएको प्रहरीले जनाएको छ । प्रहरीका अनुसार यो एक महीनामा चार जना महिला जबर्जस्ती करणीको शिकार भएका छन् ।
स्वास्थ्य परीक्षणमा कठिनाइ
पीडित र पीडक दुुवैको जुम्लामा स्वास्थ्य परीक्षण हुन नसकेका कारण अनुसन्धानमा प्रभाव परेको छ । कर्णाली स्वास्थ्य विज्ञान प्रतिष्ठान शिक्षण अस्पताल जुम्लाले विशेषज्ञ र तालीम प्राप्त चिकित्सक नभएको प्रतिक्रिया दिएपछि प्रहरीको अनुसन्धानका साथै पीडित महिला समस्यामा परेका हुन् ।
प्रतिष्ठान जुम्लाका मेडिकल डाइरेक्टर डा पुजन रोकायाले आफूहरुले असहयोग गर्न नचाहेको तर गत भदौ ४ गते आएको राजपत्रले विशेषज्ञ तथा तालीम प्राप्त चिकित्सक तोकेकाले उक्त जनशक्ति नभएको स्वास्थ्य परीक्षण गर्न नसकिएको बताए । पीडितमहिलालाई कालिकोट जिल्ला स्वास्थ्य कार्यालयमा स्वास्थ्य परीक्षण गर्न पठाएको बताउँदै परीक्षण कार्य ढिलाइले प्रमाण नष्ट हुने डर भएको प्रहरी नायब उपरीक्षक रिजालले बताए ।
विशेषज्ञ चिकित्सकका लागि गुहार
जिल्ला प्रहरी कार्यालय जुम्लाले विशेषज्ञ चिकित्सक उपलब्धार्थ सङ्घीय एकाइ सुर्खेत–हाल नेपालगञ्जमा पत्राचार गरेको छ । यसको बोधार्थ प्रहरी प्रधानकार्यालय काठमाडौँ र जिल्ला प्रशासन कार्यालय जुम्लासमेतलाई दिइएको जिप्रका जुम्लाले जनाएको छ ।
प्रतिष्ठान जुम्लाले तालीम प्राप्त चिकित्सक नभएको र राजपत्रमा उल्लेख भएबमोजिम परीक्षण गर्न नसिकने पत्र पठाएपछि सङ्घीय एकाइ सुर्खेतमा गुहार मागिएको जिप्रका जुम्लाले बताएको छ । परीक्षण जुम्लामा नहुँदा आफूहरुलाई झन पीडा भएको पीडितको गुनासो छ । तीन महीनाअघि पनि तिला गाउँपालिकाकै एक मेला हेर्न गएकी बालिका सामूहिक बलात्कारमा परेकी थिइन् ।
