- २०८१ बैशाख १७ सोमबार
सर्लाही । उखुको रकम भुक्तानी माग गर्दै रिले अनशनमा बसेका उखु किसानले अनशन तोडेका छन् । सम्पूर्ण बक्यौता रकम आगामी असोज मसान्तभित्र उद्योगले दिने निर्णय गरेपछि किसानहरुले अनशन तोडेका हुन् ।
बिक्री गरेको उखुको भुक्तानी दिन उद्योगले आलटाल गरेपछि आइतबारदेखि किसानहरु सदरमुकाम मलङ्गवाको शहीद पार्कमा रिले अनशनमा बसेका थिए ।
सोमबार साँझ जिल्ला प्रशासन कार्यालयमा उखु किसान र उद्योगीबीच भएको वार्तामा किसानको बाँकी रहेको रकम चार महीनाभित्र दिने सहमति गरिएको छ ।
प्रजिअ द्रोण पोखरेलको रोहवरमा गरिएको वार्तामा अन्नपूर्ण सुगर मिल्स धनकौलमा मौज्दात रहेको चिनी र मोलासिस बिक्री गरेको रकममध्ये ८५ प्रतिशत रकम पहिले उखु बिक्री गर्ने किसानलाई दिनुपर्ने, विगत वर्षको भुक्तानी दिन बाँकी रहेको रु १२ करोड ५० लाख असार मसान्तभित्र दिनुपर्ने, राज्यबाट प्रदान गरिने ६५ रुपैयाँ २८ पैसा अनुदान रकम यही जेठ मसान्तभित्र किसानको खातामा पठाउनुपर्ने, किसानको खातामा जम्मा गर्ने रकम र सो बमोजिमको विवरण तथा भरपाई १५–१५ दिनमा कोष तथा लेखा नियन्त्रक कार्यालयमा उपलब्ध गराउनुपर्ने निर्णयमा दुवै पक्षबीच सहमति भएको बताइएको छ ।
त्यसैगरी चिनी बिक्री वितरणमा सबैले सहयोग गर्ने र अवरोध गर्नेलाई कारवाही गर्ने निर्णय पनि गरिएको प्रजिअ पोखरेलले जानकारी दिए । पहिले उखु बिक्री गरेका किसानलाई पहिले भुक्तानी र पछि उखु बिक्री गर्नेलाई पछि भुक्तानी दिने र कसैको दबाब वा प्रभावबाट भुक्तानीमा तलमाथि गर्नेलाई पनि कारवाही गरिने निर्णय भएको उनले बताए ।
किसानका मागमा उद्योगीले सहमति जनाएपछि अनशन तोडिएको आन्दोलनको नेतृत्व गर्दै आउनुभएको राष्ट्रिय जनता पार्टी नेपालका सह–महामन्त्री राकेश मिश्रले जानकारी दिए ।
वर्तामा भएको सहमतिअनुसार किसानले भुक्तानी नपाए असोजपछि फेरि आन्दोलन गर्ने चेतावनीसमेत उनले दिए ।
