काठमाडौँ । चौथो संस्करणको प्रधानमन्त्री कप एकदिवसीय पुरुष क्रिकेटको उपाधिका लागि दुवै विभागीय टोली नेपाली सेनाको त्रिभुवन आर्मी क्लब र सशस्त्र प्रहरी बलको एपीएफ क्लब खेलिरहेका छन् ।
टस हारेर पहिला ब्याटिंग गरेको आर्मी क्लबले एपिएफलाई २१२ रनको लक्ष्य दिएको छ । आर्मीले ५० ओभरमा ९ विकेट गुमाउदै २११ रन बनाएको हो ।
आर्मीको लागि हरी चौहानले अविजित ५८ रन बनाएका थिए । त्यस्तै राजेश पुलामी मगरले २८ रन बनाए भने लोकेश बमले १५ रन बनाएका थिए । त्यस्तै सुशान भारीले १३, अनिल मण्डलले ११, रोहित पौडेलले १३
तथा भीम सार्की र कप्तान विनोद भण्डारीले ७-७ रन बनाएका थिए । त्यस्तै बिक्रम सोबले ११ रन बनाए भने शाहाब आलमले अविजित २५ रन बनाएका थिए ।
त्यसैगरी एपिएफका बलर अविनाश बोहोराले ४ विकेट लिएका थिए । त्यस्तै किशोर महतोले २ विकेट लिए भने कमल ऐरी, शरद भेस्वाकर र भुवन कार्कीले एक एक विकेट लिए ।
यसअघि पहिलो पिएम कपमा नेपाल पुलिस क्लब र आर्मी क्लब संयुक्त विजेता बनेका थिए भने दोस्रो पिएम कपको उपाधि एपिएफले जितेको थियो भने आर्मी उपविजेता बनेको थियो ।
त्यस्तै तेस्रो पिएम कपको उपाधि नेपाल पुलिस क्लबले जितेको थियो भने आर्मी उपविजेता बनेको थियो ।