- २०८१ बैशाख १५ शनिबार
काठमाडौँ । श्रीलंकाले दक्षिण अफ्रीकाविरुद्धको पहिलो टेस्ट खेलमा शानदार जित हासिल गरेको छ ।
दक्षिण अफ्रीकाले दिएको ३०४ रनको लक्ष्य पछाएको श्रीलंकाले ९ विकेट गुमाउदै लक्ष्य पुरा गरेको थियो । श्रीलंकाका लागि अन्तिम विकेटका लागि कुशल परेराले विश्वा फर्नान्डोसँग ७८ रनको साझेदारी गर्दै श्रीलंकालाई जित दिलाएका थिए । श्रीलंका एक समय ९ विकेट गुमाएर २२६ रन बनाएको अवस्थामा पाँचौ नम्बरमा ब्याटिङ गर्न आएका परेराले १५३ रन अविजित बनाउदै अविश्वसनीय जित दिलाएका थिए ।
परेराले २ सय बलको सामना गर्दै १५३ रन जोडे । उनले १२ चौका र ५ छक्का प्रहार गरेका थिए । उनलाई २७ बलमा ६ रन जोडेर फर्नान्डोले राम्रो साथ दिएका थिए । ७८ रनको साझेदारीमा परेरा एक्लैले ६७ रन बनाएका थिए ।
दक्षिण अफ्रीकाका डुयन ओलिभियर र डेल स्टेनले २-२ तथा भर्नन फिलान्डर र कागीसो राबाडाले १-१ विकेट लिएका थिए ।
पहिलो इनिङमा श्रीलंकाले १९१ रन बनाउदै अलआउट भएको थियो भने दक्षिण अफ्रिकाले पहिलो इनिङमा २३५ र दोस्रोमा २५९ रन बनाउदै श्रीलंकालाई ३०४ रनको लक्ष्य दिएको थियो ।
यस जितसँगै श्रीलंकाले २ खेलको टेस्ट सिरिजमा १-० को अग्रता लिएको छ । दोस्रो टेस्ट फेब्रुअरी २१ देखि सुरु हुनेछ ।
अविजित १५३ रन बनाएका कुशल परेरा खेलको प्लेयर अफ द म्याच बनेका थिए ।
