- २०८१ बैशाख २७ बिहीबार
जनकपुरधाम । जनकपुरस्थित बुद्ध एयरको काउन्टरमा तोडफोड गरेको आरोपमा राजपा नेपालका सांसद प्रमोद कुमार साहलाई जिल्ला अदालत धनुषाले चार दिनको म्याद थप गरेको छ ।
महानगरीय अपराध नियन्त्रण महाशाखा काठमाडौंको टोलीले मंगलबार दिउँसो पक्राउ गरी जनकपुरधाम पठाएका सांसद साहलाई अनुसन्धानका लागि चार दिने म्याद थप गरिएको हो ।
जिल्ला अदालत धनुषाको इजलास नं. १ का न्यायधिश तीर्थप्रसाद केसीको इजलासले सांसद साहलाई अनुसन्धानका लागि ४ दिनको म्याद थप गरेको हो ।
मंगलबार त्रिभुवन अन्तर्राष्ट्रिय विमानस्थलबाट ओखलढुङ्गा जाने क्रममा साहलाई पक्राउ गरेर धनुषा लागिएको थियो ।
जहाज उडाउन ढिलाइ गरेको भन्दै साहले सोमबार बुद्ध एयरको काउन्टरमा तोडफोड गरेको प्रहरीले जनाएको छ ।
पक्राउ परेका सांसदको रिहाईको माग गर्दै राजपाले आज एक घन्टा सडक जाम गरेका छन् ।
