- २०८१ बैशाख २७ बिहीबार
काठमाडौँ । गायिका आस्था राउतलाई चार दिन हिरासतमा राखेर अनुसन्धान गर्न प्रहरीले अनुमति पाएको छ ।
जिल्ला प्रशासन कार्यालय काठमाडौँले राउतलाई चार दिन हिरासतमा राखेर अनुसन्धान गर्ने अनुमति दिएको हो ।
सोमबार प्रहरी परिसर पुगेकी राउतमाथि अनुसन्धानका लागि प्रहरीले सात दिन थुनामा राख्ने अनुमति मागेकोमा जिल्ला प्रशासन कार्यालयले चार दिनको अनुमति दिएको हो ।
प्रहरीले सरकारी वकिलमार्फत राउतलाई थुनामा राखेर अनुसन्धान गर्न सात दिनको अनुमति मागेको थियो ।
गायिका राउतमाथि अभद्र व्यवहार अन्तर्गतको कसुरमा अनुसन्धान भइरहेको छ ।
माघ १ गते त्रिभुवन अन्तर्राष्ट्रिय विमानस्थलमा प्रहरी जवान रमिता श्रेष्ठमाथि दुर्व्यवहार गरेको आरोपमा श्रेष्ठले जाहेरी दिएपछि जिल्ला प्रशासन कार्यालय काठमाडौंले माघ ५ गते राउतविरूद्ध पक्राउ पूर्जी जारी गरेको थियो ।
