- २०८१ बैशाख १७ सोमबार
काठमाडौँ। नेपालको युएईसँग हुने एकदिवसीय र टी-२० क्रिकेट सिरिजका लागि १६ सदस्यीय खेलाडीको छनौट गरिएको छ। आगामी माघ ९ देखि २० गते (जनवरी २३ देखि फेब्रुअरी ३ ) सम्म हुने यस सिरिजमा नेपालले युएईसँग तीन एक दिवसीय र तीन टी–२० खेल खेल्ने तय भएको छ ।
प्रारम्भिक २० खेलाडीको क्याम्पपछि युएई जाने अन्तिम टिमको घोषणा गरिएको नेपाली राष्ट्रिय टिमका म्यानेजर रमण शिवाकोटीले जानकारी दिएका छन्।
युएई टुरमा जाने नेपाली खेलाडीमा पारस खड्का (कप्तान), ज्ञानेन्द्र मल्ल (उपकप्तान), अभिनाश बोहोरा, बसन्त रेग्मी, भीम सार्की, बिनोद भण्डारी, दिपेन्द्र सिंह ऐरी, करण केसी, ललित नारायण राजबंशी, मोहमद आरिफ शेख, पवन सराफ, प्रदीप ऐरी, रोहित कुमार पौडेल, सन्दीप लामिछाने, सोमपाल कामी र सन्दीप जोरा रहेका छन् ।
त्यस्तै ललित भण्डारी, सुसन भारी र विक्रम शोव भने वैकल्पिक खेलाडीमा परेका छन् ।
घोषणा गरिएको टिमबाट सिनियर खेलाडी शरद भेस्वाकरले भने अस्वस्थ भएका कारण टिमबाट आफ्नो नाम फिर्ता लिएका छन् । त्यस्तै युवा खेलाडी पवन सराफ, अभिनाश बोहोरा, सन्दीप जोरा र भीम सार्की राष्ट्रिय टिममा पहिलो पटक परेका छन् ।
साथै हाल बंगलादेश प्रिमियर लिग खेलिरहेका सन्दीप लामिछाने सोमबार नेपाल फर्किने भएका छन् ।
टिमको छनौट कप्तान पारस खड्का, हेड कोच जगत टमटा र आइसीसीका प्रतिनिधि अमिनुल इस्लामले गरेका हुन्।
नेपालले युएईसँग माघ ११ गते (जनवरी २५), माघ १२ (जनवरी २६) माघ १४ (जनवरी २८) मा एकदिवसीय खेल खेल्दै छ भने माघ १७ (जनवरी ३१), माघ १८ (फेब्रुअरी १) र माघ २० (फेब्रुअरी ३) मा टी-२० खेल्दै छ। प्रतियोगित का सबै खेल दुबइमा हुने भएका छन्।
गत मार्चमा जिम्बावेमा भएको वानडे वर्ल्ड कप क्वालिफायरमा उत्कृष्ट तीन एसोसिएट बन्दै नेपालले पहिलो पटक एकदिवसीय मान्यता पाएको थियो। त्यसपछि नेपालले खेल्न लागेको यो दोस्रो एकदिवसीय सिरिज हो।
गत अगष्टमा नेदरल्याण्ड्ससँग पहिलो एकदिवसीय सिरिज खेलेको नेपालले युएईविरुद्ध दोस्रो पटक एकदिवसीय खेल खेल्न लागेको हो। युएईविरुद्ध यो पहिलो सिरिज भएपनि नेपालले एसिया कप छनोटमा युएईविरुद्ध एकदिवसीय खेल खेलिसकेको हो। दुवै टिम एकदिवसीय मान्यता प्राप्त भएकाले नेपाल र युएईबीचको खेलले एकदिवसीय मान्यता पाएको थियो।
नेपालले अहिलेसम्म तीन एकदिवसीय खेल खेल्दा एक खेल मात्र जितेको छ भने दुईमा हार बेहोरेको छ।
यस्तै एकदिवसीय मान्यता पाएपछि नेपालले नदरल्याण्ड्ससँग इंग्ल्याण्ड्को लर्ड्समा खेलेको टी-२० इन्टरनेशनल खेल भने वर्षाले प्रभावित भएपनि नतिजा विहिन बनेको थियो।
